Goldfingermálið kært til Mannréttindadómstólsins

Mál blaðamannsins Bjarkar Eiðsdóttur hefur, með stuðningi Blaðamannafélags Íslands og Birtings útgáfufélags ehf. verið kært til Mannréttindadómstóls Evrópu. Í fréttatilkynningu frá Blaðamannafélagi Íslands kemur fram að kærð sé niðurstaða Hæstaréttar í máli Ásgeirs Þórs Davíðssonar á veitingahúsinu Goldfinger gegn blaðamanni og ritstjóra Vikunnar.

Í málinu var blaðamanni og ritstjóra Vikunnar stefnt fyrir ummæli sem höfð voru eftir fyrrum starfsstúlku á veitingahúsinu Goldfinger í viðtali, meðal annars um að vændi tengdist starfseminni. Starfsstúlkunni fyrrverandi var einnig stefnt en það var síðan dregið til baka eftir að hún staðhæfði fyrir dómi að ekki væri rétt eftir henni haft í viðtalinu.

Héraðsdómur sýknaði bæði blaðamann og ritstjóra blaðsins, þar sem þær gætu ekki talist höfundar ummælanna. Hæstiréttur sneri niðurstöðunni við og taldi blaðamanninn höfund greinarinnar og samkvæmt prentlögum væri hann því ábyrgur fyrir öllu sem kæmi þar fram.

Í kærunni sem send var Mannréttindadómstólnum í dag er kvartað yfir því að niðurstaða Hæstaréttar í málinu brjóti gegn 10. gr. mannréttindasáttmála Evrópu, sem Ísland hefur lögleitt. Segir Blaðamannafélag Íslands að Mannréttindadómstóll Evrópu hafi margsinnis ítrekað í dómum sínum, að það feli í sér alvarlegt brot á tjáningarfrelsi og gangi gegn frelsi fjölmiðla að gera blaðamann ábyrgan fyrir orðum viðmælanda síns.