Bennett: Menn haga sér eins og villidýr

Úrvalsdeildardómarinn Steve Bennett gagnrýnir stjóra og leikmenn í deildinni harðlega fyrir að haga sér eins og villidýr á leikjum.

Í samtali við Daily Mirror segist dómarinn óttast framtíðina því menn beri litla virðingu fyrir dómurum í deildinni.

"Flest okkar myndu aldrei hella okkur yfir annað fólk með blótsyrðum utan vallar og haga okkur eins og villidýr. Það er sorglegt að svona lagað skuli eiga sér stað í íþróttagrein sem kölluð hefur verið leikurinn fallegi," sagði dómarinn.

Stjórar eins og Alex Ferguson hjá Manchester United og Joe Kinnear hjá Newcastle hafa komist í fréttirnar undanfarið fyrir gagnrýni sína á dómara og Bennett segir að taka verði hart á slíkum málum.

"Stundum koma bara upp meiri deilur þegar verið er að tækla svona mál, en það þýðir ekki að loka augunum fyrir þeim. Dómarar eru oft blórabögglar og sú litla virðing sem borin er fyrir störfum þeirra verður til þess að sífellt færri menn kæra sig um að dæma leiki í úrvalsdeildinni," sagði Bennett.