Alonso vill ekki fara frá Liverpool

Xabi Alonso, miðjumaður hjá Liverpool, segir ekkert til í þeim orðrómi að hann sé á leið til Juventus eða nokkuð annað - hann sé ánægður hjá enska félaginu.

Alonso átti ekki sína bestu leiktíð með Liverpool í vetur og hefur fyrir vikið verið orðaður við lið um gervalla Evrópu, ekki síst Juventus.

Hann segir hinsvegar ekkert nýtt að slúðrað sé um framtíð sína.

"Það eru alltaf einhverjar vangaveltur í gangi. Ég veit hver staða mín er. Ef félagið vildi selja mig, myndi ég væntanlega vita af því. Þá myndi ég líka bara sætta mig við það og leita að nýjum klúbbi. Ég hef hinsvegar ekki heyrt neitt slíkt og því held ég að ég eigi mér framtíð hjá Liverpool," sagði Alonso í samtali við spænska fjölmiðla.