Viktor: Ég vil fara til Vals

Viktor Unnar Illugason segir að hann sé áhugasamur um að ganga í raðir Valsmanna sem vilja sömuleiðis fá hann til sín.

Hann æfði með Val á föstudaginn og spilaði í æfingaleik með liðinu nú um helgina. „Valur vill fá mig og ég hugsa að ég vilji fara til þeirra. Mér líst vel á þá."

Viktor lék með Breiðabliki í efstu deild árið 2006 og skoraði þá eitt mark í níu leikjum. Hann gekk þá til liðs við Reading í Englandi, aðeins sextán ára gamall.

En nú hefur hann hug á að koma heim á nýjan leik. „Ég er búinn að vera meira eða minna meiddur síðan í febrúar í fyrra. Ég ætla því að reyna að ná mér góðum á undirbúningstímabilnu og koma sterkur inn næsta sumar."

Valsmenn þurfa þó fyrst að semja við Reading um kaup á Viktori en samningur hans við félagið rennur út í lok tímabilsins á Englandi. Ef honum verður gert að klára samninginn fær hann ekki leikheimild hér á Íslandi fyrr en 15. júlí.

Til stóð að Viktor yrði lánaður til Þróttar síðastliðið sumar en ekkert varð úr því vegna meiðsla hans.