United hefur engin sönnunargögn

Roman Calderon, forseti Real Madrid, segir að Manchester United hafi engin sönnunargögn fyrir því að félagið hafi hagað sér ósæmilega í tengslum við áhuga þess á Cristiano Ronaldo.

United sendi inn formlega kvörtun til Alþjóða knattspyrnusambandsins, FIFA, vegna meintrar hegðunar Real Madrid. Bæði Calderon og Bernd Schuster, knattspyrnustjóri Real Madrid, hafa lýst aðdáun sinni á Ronaldo í fjölmiðlum undanfarnar vikur.

„Þeir eru ekki með nein sönnunargögn því ekkert hefur gerst," sagði Calderon. „Það hafa verið orðrómar á kreiki um að leikmaðurinn vilji fara og blöðin hafa skrifað ýmislegt. Það er allt og sumt."

„En sem stendur er ómögulegt fyrir Ronaldo að færa sig um set því United vill ekki selja hann. Það er vissulega réttur United að kvarta en við höfum ekkert gert og munum ekkert gera. Þetta mál er á milli félagsins og leikmannsins."