Mourinho: Chelsea átti lélega leiktíð

Jose Mourinho lá ekki á skoðunum sínum í gær þegar hann var spurður hvort Chelsea hefði átt góða leiktíð. Hann segir að Chelsea hafi strangt til tekið átt lélega leiktíð.

Mourinho lét þessi orð falla í samtali við Observer áður en Avram Grant var rekinn frá Chelsea í gær.

"Það fer eftir ýmsu," sagði Mourinho þegar hann var beðinn að meta gengi liðsins.

"Frá mínum bæjardyrum séð átti Chelsea slæma leiktíð, því "næstum því" er ekki gott. Liðið vann næstum því deildarbikarinn, deildina og Meistaradeildina. Næstum því er ekkert. Sumir vilja kannski meina að Chelsea hafi átt fínt ár, en það er skoðun undirmálsmanna," sagði Mourinho.