Ameobi lánaður til Stoke

Stoke City hefur fengið sóknarmanninn Shola Ameobi lánaðan frá Newcastle. Þessi 26 ára leikmaður hefur skorað 46 mörk í rúmlega 100 leikjum með Newcastle en hefur aðeins tvisvar komið við sögu síðan Kevin Keegan tók við liðinu.

Stoke er í efsta sæti ensku 1. deildarinnar og segir stjóri liðsins, Tony Pulis, að með þessu sé Stoke að sýna að allt sé gert til að koma liðinu upp í ensku úrvalsdeildina.

Fleiri 1. deildarlið voru að styrkja sig í dag en Crystal Palace sem situr í 8. sæti deildarinnar hefur fengið sóknarmanninn Scott Sinclair lánaðan frá Chelsea. Fyrr á leiktíðinni var Sinclair lánaður til Charlton en fékk fá tækifæri.