Forbes tilnefnir áhrifamestu stjörnurnar

Oprah trónir nú sem fyrri ár á toppi Forbes-listans yfir áhrifamesta fólkið í Hollywood. Auk gríðarvinsæls spjallþáttar síns, útvarpsþáttar og tímarits, á hún hluti í spjallþáttum Dr. Phils og Rachel Ray. Hún er bæði ríkasta konan, og blökkumaðurinn, á listanum, og er auður hennar metinn á rúman einn og hálfan milljarð bandaríkjadala - um hundrað milljarða króna.

Fast á hæla Opruh fylgir kylfingurinn Tiger Woods, sem afrekaði það fyrstur íþróttamanna að þéna meira en hundrað milljónir dollara á einu ári. Á eftir honum kemur svo poppdrottningin Madonna, en tónleikaferðalag hennar á árinu rakaði saman einum 194 milljónum dollara og varð þar með tekjuhæsta tónleikaferðalag sögunnar hjá kvenkyns listamanni.

Listinn er reiknaður út frá tekjum, leitum á leitarvélum á borð við Google, umfjöllun í fjölmiðlum og hversu oft stjarnan prýðir forsíðu 32ja stærstu tímarita vestanhafs.

Meðal hástökkvara ársins er leikkonan Angelina Jolie, sem skýst í 14. sæti úr því 35. á síðasta ári, ekki síst vegna umfjöllunar um sambands hennar við Brad Pitt. David Beckham hoppar upp um 28 sæti, og vermir nú fimmtánda sætið, og er það rakið til samnings hans við LA Galaxy liðið.

Listinn vekur ekki síður athygli fyrir þær stjörnur sem duttu af honum þetta árið. Leikararnir Jim Carrey, Halle Berry og Cameron Diaz virðast ekki eiga upp á pallborðið þetta árið, og hrundu út af listanum. Sömuleiðis virðast ölvunarakstur og fangelsisvistir valdið verðfalli slúðurdrottninganna Paris Hilton og Nicole Richie, sem báðar misstu sæti sín.