Vilja fund með ráðherrum vegna uppsagna í fiskvinnslu

Starfsgreinasamband Íslands hyggst óska eftir fundi með forsætisráðherra og félagsmálaráðherra vegna þess alvarlega ástands sem sé að skapast í fiskvinnslu.

Fram kemur á heimasíðu sambandsins að það hafi verið ákveðið á fundi framkvæmdastjórnar Starfsgreinasambandsins í gær. Bent er á að uppsagnir og óvissa muni hafa atgervisflótta í för með sér sem skaða mun greinina til lengri tíma. Farið er fram á að uppstokkun á úthlutun aflaheimilda og nýrra samfélagslegra skilyrða og ábyrgðar í því sambandi, áður en það yrði endanlega um seinan.

Bent er á að sjávarútvegsráðherra hafi hvatt til þess í fyrrasumar, þegar þorskkvótinn var skorinn niður, að málefnaleg umræða færi fram um sjávarútveginn. „Sú umræða hefur ekki farið fram að neinu gagni og ekki skilað árangi. Þær uppsagnir sem nú dynja á verkafólki í fiskvinnslu minnir enn á þá staðreynd að íslenskir kvótaeigendur, geta landað öllum afla af Íslandsmiðum hvar sem þeim sýnist, jafnvel í útlöndum, án nokkurrar samfélagslegrar ábyrgðar. Fiskvinnslufólkið situr í sárum. Þessu ástandi verður að linna," segir á heimasíðunni.

Bent er á að sjávarútvegurinn hafi veikst á síðustu árum og greinin hafi aldrei verið skuldssettari. Nýsköpun sé lítil sem engin, vísindaleg nálgun í fiskvinnslu, menntun, markaðs- og þróunarvinna sé í skötulíki og framtíðarsýn óljós. Þá hafi kvótabrask og græðgi verið aðall greinarinnar.

Bent er á að starfólk í sjávarútvegi og fiskvinnslu sé nú um níu þúsund og hafi fækkað um rúmlega fjögur þúsund á tæpum áratug og stefni hraðbyri niður á við. „Hagræðingin og tæknivæðingin skilar sér ekki til fiskvinnslufólks, þar miðar frekar afturábak en áfram í launkjörum í samanburði við aðra hópa," segir Starfsgreinasamandið enn fremur.