Ferguson: Ronaldo verður ekki seldur

Sir Alex Ferguson, stjóri Manchester United, hefur sent Real Madrid afdráttarlaus skilaboð varðandi Cristiano Ronaldo. Hann er ekki til sölu.

Ronaldo hefur mikið verið orðaður við spænska stórliðið og fjölmiðlar á Spáni hafa haldið því fram að forráðamenn Real Madrid séu að undirbúa stærsta tilboð sögunnar í portúgalska snillinginn.

Sir Alex er þó á öðru máli og segist ekki tilbúinn að horfa á eftir Ronaldo líkt og hann horfði á eftir Ruud van Nistelrooy og David Beckham til Spánar á sínum tíma.

"Þegar þú vilt halda leikmanni, gerir þú allt sem í þínu valdi til að halda honum. Það vitum við og það vita forráðamenn Real. Við seldum þeim Nistelrooy og Beckham af því við vorum tilbúnir til þess," sagði Ferguson.

Hann segir engin áform uppi um að selja leikmenn, en menn eins og Gerard Pique og Louis Saha hafa verið orðaðir við önnur félög.

"Við ætlum ekki að losa okkur við leikmenn og það er ekkert sem ég hef verið að íhuga. Við þurfum bara að skoða leikmannahópinn og sjá hvort við höfum menn í allar stöður. Við höfum eftir allt þrjá leiki í viðbót til að hafa áhyggjur af á næsta tímabili þar sem við þurfum að spila í meistarakeppninni og heimsmeistarakeppni félagsliða," sagði Ferguson í samtali við Sky.