HK-ingar hleyptu meiri spennu í botnbaráttuna

HK vann í gær sannfærandi 4-0 sigur á Þrótti og vann þar með sinn þriðja sigur í röð. Liðið hefur fengið tvöfalt fleiri stig í síðustu fjórum leikjum liðsins en í öllum hinum fjórtán leikjum sumarsins. Fyrir vikið er liðið nú aðeins einu stigi frá Fylki sem er í tíunda sæti deildarinnar.

Almir Cosic skoraði fyrsta mark HK í fyrri hálfleik en þeir Hörður Magnússon, Rúnar Már Sigurjónsson og Aaron Palomares bættu við þremur í þeim síðari.

„Seinni hálfleikurinn var betri en sá fyrri," sagði Rúnar Páll Sigmundsson, þjálfari HK. „Við vorum svolítið langt á eftir mönnunum okkar en náðum samt að fá nokkur ágæt færi. En í heildina er ég hrikalega ánægður með leikinn."

Kollegi hans, Gunnar Oddsson, þjálfari Þróttar, var vitanlega ekki eins sáttur. „Það var ömurlegt að horfa upp á þetta. Við vorum gjörsamlega teknir í bakaríið af spræku liði HK og vorum engan veginn klárir í bardagann. Við vorum búnir að fara vel yfir síðasta leik og æfðum grimmt í vikunni og tónninn var fínn fyrir."

HK-ingar hafa nú komið fjölmörgum sparkspekingum á óvart enda voru margir búnir að afskrifa þá. Rúnar Páll var þó ekki einn þeirra.

„Ég sá þetta fyrir enda veit ég allt um getu liðsins. Við höfum aldrei misst trúna á okkur og það hefur fleytt okkur langt. Liðsheildin og samstaðan er einnig mjög góð og það er að skila sér."

„Ég þarf ekkert að pæla í hvað aðrir segja enda höfum við aðeins verið að einbeita okkur að okkar eigin markmiðum. Ef við höldum áfram að safna stigum þá munum við ná þeim og halda okkur í deildinni."

Þróttur er nú átta stigum á undan botnliði ÍA og fjórum á undan HK. Þeir eru því ekki hólpnir og telur Gunnar að liðið þyrfti meira en einn sigur til að bjarga sér. „Ég hef áhyggjur af því að við skulum ekki ná að rífa okkur úr þessum pakka. Einn sigur í viðbót mun ekki duga. En við eigum ÍA næst og við þurfum að nota þær tvær vikur sem eru í leikinn vel og vandlega."