Eriksson hættur hjá Man City

Manchester City er búið að reka Sven-Göran Eriksson úr starfi knattspyrnustjóra. Sá sænski stýrði City til Evrópusætis á nýliðnu tímabili en fékk þau skilaboð frá eiganda liðsins, Thaksin Shinawatra, í apríl að ekki væri þörf á hans kröftum.

„Ég hef notið þessa stutta tíma hjá Manchester City mjög mikið og vill þakka stuðningsmönnum, leikmönnum og starfsliðinu fyrir frábæran stuðning," sagði Eriksson.

Þessi fyrrum landsliðsþjálfari Englands tók við stjórastarfinu hjá City síðasta sumar. Liðið náði frábærum árangri fyrri hluta mótsins en Thaksin var ósáttur við gengi þess seinni hlutann.

Eriksson eyddi 46 milljónum punda til leikmannakaupa hjá City. Leikmenn City eru víst undrandi að Eriksson var látinn taka pokann sinn og þá stendur meirihluti stuðningsmanna við bak hans.

Thaksin þarf nú að finna nýjan knattspyrnustjóra áður en nýtt tímabil hefst í ágúst. Sagt er að Luiz Felipe Scolari og Mark Hughes séu efstir á óskalistanum.