Vilja aðildarviðræður við ESB strax

Stjórn kjördæmisráðs Samfylkingarinnar í Norðvesturkjördæmi segir að hefja þurfi strax aðildarviðræður við ESB í ljósi efnahagsástandsins. Í yfirlýsingu krefst kjördæmisráðið uppgjörs við efnahags- og peningamálastefnu undanfarinna áratuga.

,,Nú þarf breytingar til batnaðar með ábyrgð, jöfnuð og velferð almennings að markmiði. Taumlaus frjálshyggja og markaðshyggja hefur dregið þjóðina í skuldafen og við því þarf að bregðast. Alþingi verður að láta vinna vandaða rannsókn á því hvað brást, hvaða lærdóm megi draga og hvernig nýtt regluverk fyrir fjármálalífið á að vera. Leita skal til aðila og einstaklinga, sem eru óháðir tengslaneti íslensks atvinnulífs og stjórnmála. Rannsaka skal lögmæti viðskipta og ákvarðana í aðdraganda hrunsins í bönkunum á síðustu mánuðum og þeir sóttir til saka sem kunna að vera sekir," segir í yfirlýsingunni.

Þá segja Samfylkingarmenn í Norðvesturkjördæmi að forsendur stefnuyfirlýsingar ríkisstjórnarinnar séu gjörbreyttar og og tími umþóttunar um aðildarviðræður við ESB sé liðinn, þær viðræður þurfi stjórnvöld að hefja strax. ,,Ísland hefur leitað aðstoðar alþjóðasamfélagsins en það þarf líka að gera róttækar breytingar á stjórn efnahagsmála, bæði á hinum pólitíska vettvangi og innan stjórnkerfisins, með uppstokkun embætta og stórefldu eftirliti í viðskiptalífinu. Stjórn Seðlabanka Íslands verður að víkja og við endurmönnun bankastjórna verður að fara að lögum um jafnrétti kynjanna. Jafnframt skal leggja áherslu á að kjör yfirstjórnenda verði endurskoðuð og þeim stillt í hóf," segir í yfirlýsingu kjördæmisráðsins.

Enn fremur að ríkisstjórnin verði að gæta hagsmuna íslensks almennings og krefjast þess að bresk stjórnvöld láti þegar af hermdaraðgerðum sínum og standi við gagnkvæmar skuldbindingar við Ísland sem NATO-ríki. Þá hrósar kjrödæmisráðið ráðherrum Samfylkingarinnar fyrir að hafa staðið vaktina fyrir íslenskan almenning af æðruleysi, dugnaði og hæfni. ,,Samfylkingin, með jafnaðarstefnuna að leiðarljósi, á að leiða endurreisn íslensks efnahagslífs," segir einnig í yfirlýsingunni.