Scholes á skilið að spila úrslitaleikinn

Ryan Giggs hjá Manchester United segir félaga sinn Paul Scholes eiga skilið að fá tækifæri í byrjunarliði liðsins í úrslitaleiknum í Meistaradeildinni í næstu viku.

Scholes skoraði ógleymanlegt mark gegn Barcelona í undanúrslitunum og vill eflaust fá að reyna sig í úrslitaleiknum nú eftir að hafa þurft að taka út leikbann ásamt fyrirliðanum Roy Keane þegar United lék til úrslita í keppninni árið 1999.

"Scholesy á skilið að spila úrslitaleikinn af því hann er frábær leikmaður," sagði Giggs. "Hann hefur verið í fantaformi undanfarið og það var mark hans sem tryggði okkur sæti í úrslitaleiknum. Það eru sannkölluð forréttindi að fá að spila með manni eins og Scholes - hann gerir hluti sem aðrir leikmenn geta ekki," sagði Giggs í viðtali á heimasíðu United.