Hægt að gera athugasemdir við brottvísanir

Á fundi stjórnar KSÍ á dögunum voru gerðar nokkrar breytingar á reglugerðum sambandsins.

Þar á meðal verður hægt að gera athugasemdir við rauð spjöld á Íslandsmótinu næsta sumar.

Telji leikmaður, þjálfari og forráðamaður liðs að brottvísun hafi ekki verið réttmæt má gera athugasemd. Með því er hægt að koma í veg fyrir að leikbann verður lengra en einn leikur. Ljóst er að fyrir brottvísun þarf maður þó alltaf að taka út eins leiks bann.

Aganefnd KSÍ mun þá fá aukið svigrúm til að nota myndbandsupptökur við úrskurði sína. Einnig var gerð sú breyting að lið getur ekki lengur tapað leik fyrir að nota þjálfara eða forráðamann í leikbanni. Í stað þess verður tekið upp sektakerfi.

ÍH féll úr 2. deild síðasta sumar þar sem að þjálfari liðsins sem var í leikbanni hafði of mikil afskipti í leik liðsins gegn Tindastóli. ÍH missti stig sín frá þeim leik og féll þar með í 3. deildina. Ljóst er að þetta getur ekki gerst á næsta tímabili.