Bjarni frá í 6-9 mánuði

Bjarni Þór Viðarsson er að öllum líkindum með slitið krossband í hné og verður af þeim sökum frá í allt að 6-9 mánuði.

Bjarni meiddist í leik með varaliði FC Twente sem leikur í hollenska úrvalsdeildinni. Þangað kom hann nú í janúar frá Everton í Englandi.

Hann fór svo í myndatöku á hnénu í gær og niðurstöðurnar voru ekki góðar.

„Fremra krossbandið er líklega það mikið skaddað að ég þarf að fara í aðgerð og fá nýtt. Það er líka liðband slitið en það tekur ekki nema 6 vikur að jafna sig á því."

„Samkvæmt þessu þurfa að líða 6-9 mánuðir þar til ég verð kominn á fullt á ný. Þeir eru reyndar ekki fullvissir um meiðslin og vilja því bíða í þrjár vikur áður en aðgerðin fer fram. En ég finn það sjálfur að það er eitthvað mikið að í hnénu."

„Það þýðir auðvitað ekkert annað en að halda áfram og láta til sín taka þegar maður kemst aftur á fullt. Ég ætla mér líka að styrkja löppina svo þetta komi ekki fyrir aftur," sagði Bjarni.

Bróðir hans, Arnar Þór, er einnig á mála hjá FC Twente en hann hefur verið í láni hjá öðru liði í hollensku úrvalsdeildinni, De Graafschap, í vetur.