Ronaldo tryggði United öll stigin

Cristiano Ronaldo var enn og aftur hetja Manchester United í dag þegar liðið vann nauman 1-0 sigur á botnliði Derby á útivelli í ensku úrvalsdeildinni. Fernando Torres hélt uppteknum hætti og skoraði sitt 20. mark í deildinni þegar hann tryggði Liverpool sigur á Reading.

Manchester United þurfti að hafa fyrir öllu sínu gegn baráttuglöðum Derby mönnum sem fengu síðast stóran skell gegn Chelsea. Ronaldo átti skot í stöngina í fyrri hálfleik en fyrrum United maðurinn Roy Carroll sá oftar en ekki við gömlu félögunum. Sigurmark Ronaldo kom á 75. mínútu eftir laglegan undirbúning frá Wayne Rooney.

Liverpool lenti undir 1-0 á Anfield gegn Reading eftir þrumufleyg Marek Matejovski eftir aðeins fimm mínútna leik. Javier Masherano jafnaði fyrir Liverpool fyrir hlé og það var svo hinn magnaði Torres sem skoraði sigurmarkið og tryggði þeim rauðu mikilvæg stig. Ívar Ingimarsson var að venju í byrjunarliði Reading.

Portsmouth lagði Aston Villa 2-0 þar sem Jermain Defoe kom Portsmouth yfir og Nigel Reo-Coker skoraði sjálfsmark. Sulley Muntari og Olof Mellberg fengu að líta rauða spjaldið undir lokin. Hermann Hreiðarsson var í liði Portsmouth í dag og lék stöðu miðvarðar.

Chelsea vann nauman 1-0 sigur á Sunderland á útivelli þar sem fyrirliðinn John Terry skoraði sigurmarkið með laglegum skalla og var það fyrsta mark hans fyrir liðið síðan í ágúst 2006. Þetta var níundi sigur Chelsea í síðustu tólf leikjum í deildinni og greinilegt að lærisveinar Avram Grant hafa ekki sagt sitt síðasta í baráttunni um titilinn.

Draumabyrjun Sears

Varamaðurinn Freddie Sears var hetja West Ham í dag þegar liðið komst á sigurbraut á ný með 2-1 sigri á Blackburn. Sears skoraði sigurmark Hamranna undir lokin í sínum fyrsta leik fyrir félagið, en hann er aðeins 18 ára gamall.

Roque Santa Cruz kom gestunum í Blackburn yfir en Dean Ashton jafnaði fyrir West Ham, sem hafði tapað þremur leikjum í röð með markatölunni 4-0.

Úrslitin í dag:

Derby 0-1 Man Utd

Liverpool 2-1 Reading

Portsmouth 2-0 Aston Villa

Sunderland 0-1 Chelsea

West Ham 2-1 Blackburn

Einn leikur er eftir í dag þar sem Arsenal tekur á móti Middlesbrough klukkan 17.

Staða efstu liða í úrvalsdeildinni: