Alþjóðleg dreifing

Samningar hafa náðst milli Reykjavík Films, sem framleiddi sjónvarpsþættina Mannaveiðar, og þýska fyrirtækisins Bavaria Film International um alþjóðlega dreifingu þáttanna.

Bavaria Film er eitt stærsta fyrirtæki Evrópu í sölu kvikmynda og sjónvarpsefnis og dreifir kvikmyndaefni um allan heim. Þættirnir, sem nefnast I Hunt Men á ensku, verða fyrst kynntir á alþjóðlegri kaupstefnu fyrir sjónvarpsefni sem nú stendur yfir í Cannes í Frakklandi.

Handrit Mannaveiða, sem voru sýndir í Ríkissjónvarpinu í vor, skrifaði Sveinbjörn I. Baldvinsson og byggir það á sögu Viktors Arnar Ingólfssonar, Aftureldingu. Sagan nefnist Daybrake á ensku og hefur verið gefin út víða í Evrópu.