Markvörður dæmdur í sjö ára fangelsi

Luke McCormick, fyrrum markvörður enska B-deildarliðsins Plymouth, var í morgun dæmdur í 7 ára og fjögurra mánaða fangelsi fyrir að verða valdur dauða tveggja ungra drengja eftir að hafa ekið undir áhrifum áfengis.

McCormick er 24 ára gamall en atvikið átti sér stað þann 7. júní síðastliðinn. McCormick var að keyra heim til Plymouth eftir að hafa verið gestur í brúðkaupi félaga síns og keyrði á aðra bifreið á leiðinni.

Í henni voru tvær fjölskyldur. Feðgar á leið á Silverstone-kappakstursbrautina. Tveir bræður, átta og tíu ára, létust í árekstrinum og faðir þeirra var fluttur mikið slasaður á sjúkrahús.

Hinir feðgarnir, 49 ára karlmaður og tveir synir hans, voru fluttir minna slasaðir á sjúkrahús.

Auk þess sem McCormick mældist með óhóflega mikið magn af áfengi í blóðinu var bifreið hans einnig ótryggð.

Plymouth hefur rift samningi sínum við McCormick en hann var hjá félaginu á sama tíma og Bjarni Guðjónsson.