Króatar næsta öruggir í 8-liða úrslit

Króatar tryggðu sér í kvöld nánast öruggt sæti í 8-liða úrslitunum á EM með fræknum 2-1 sigri á Þjóðverjum í toppslagnum í B-riðli. Sigur Króata var verðskuldaður, en þýska liðið fann raunar aldrei taktinn í leiknum.

Það var Dario Srna sem kom Króötum yfir á 24. mínútu eftir laglega sendingu frá Danijel Pranjic og Ivica Olic kom Króötunum svo í 2-0 eftir rúmlega klukkutíma leik eftir vandræðagang í þýsku vörninni.

Lukas Podolski minnkaði muninn fyrir Þjóðverja með sínu þriðja marki í keppninni þegar ellefu mínútur voru til leiksloka, en lengra komust Þjóðverjarnir ekki.

Varamaðurinn Bastian Schweinsteiger lét svo reka sig af velli fyrir að hrinda Jerko Leko undir lokin.

Lærisveinar Slaven Bilic fögnuðu eins og óðir menn í leikslok, enda hafa þeir farið langt með að tryggja sig í 8-liða úrslitin.

Þjóðverjar eiga nú eftir leik gegn Austurríkismönnum í riðlinum og útlit fyrir að þeirra bíði það erfiða verkefni að mæta Portúgölum í 8-liða úrslitunum.

Króatar hafa sex stig í B-riðli, Þjóðverjar 3 og Austurríkismenn og Póverjar ekkert - en þessar þjóðir eigast við síðar í kvöld.