Hull upp að hlið Chelsea og Liverpool

Hull heldur áfram frábæru gengi í ensku úrvalsdeildinni eftir 3-0 útivallarsigur á West Brom í dag.

Hull er nú með 20 stig á toppi deildarinnar, rétt eins og Chelsea og Liverpool sem mætast á morgun.

Staðan í fyrri hálfleik var markalaus en Kamil Zayatte kom Hull yfir með glæsilegu skoti eftir hornspyrnu Dean Marney.

Stundarfjórðungi síðar skoraði Geovanni sitt fjórða mark á tímabilinu og annað mark Hull í leiknum. Hann skoraði með skalla eftir fyrirgjöf Marlon King.

King var svo sjálfur að verki örskömmu síðar eftir að boltinn var skallaður fyrir fætur hans. King kláraði færið af miklu öryggi og gulltryggði þar með sigur Hull.

Þetta var fjórði sigur Hull í röð og sá fjórði á útivelli. Glæsilegur árangur hjá liði sem er að spila í efstu deild í Englandi í fyrsta sinn.