Afhentu undirskriftir gegn niðurrifi húsa við Laugaveg

Júlíusi Vífli Ingvarssyni, formanni skipulagsráðs Reykjavíkur, var í morgun afhentur listi með undirskriftum 330 íbúa sem mótmæla niðurrifi húsanna við Laugaveg og fyrirhugaðri byggingu Listaháskóla Íslands.

Fram kemur í tilkynningu að gengið hafi verið í hús í nánasta umhverfi fyrirhugaðrar byggingar og undirskriftum safnað.

Undirskriftunum var safnað á þriggja vikna tímabili í september en henni var hætt þegar aðstæður breyttust skyndilega í þjóðfélaginu. ,,Aðallega vegna þess að ólíklegt þótti að ráðist yrði í þessar framkvæmdir í nánustu framtíð. Ef ákveðið verður að halda áfram með byggingu skólans í óbreyttri mynd má búast við að söfnun undirskrifta verði einnig haldið áfram," segir í tilkynningu.