Davíð vonar að aðstoð IMF feli ekki í sér niðurlægingu

Davíð Oddsson seðlabankastjóri segir í samtali við breska blaðið Financial Times að hann telji að sú ákvörðun Seðlabanka Bandaríkjanna, Evrópu og Englands að neita Seðlabanka Íslands um fjárhagsaðstoð hafi átt sinn þátt í falli íslensku bankanna. ,,Ef við hefðum haft meira fjármagn þá hefðum við verið í betri stöðu til að þrýsta á bankana að minnka umsvif sín," segir Davíð. Þá hefur hann efasemdir um aðstoð Alþjóðagjaldeyrissjóðsins og segist vona að hún feli ekki í sér niðurlægingu.

Davíð fer yfir þróun mála í samtali við Financial Times. Þar segist hann ítrekað hafa varað stjórnendur bankanna við því að þeir væru í hættu en slíkar viðvaranir hafi verið hunsaðar. Reynt hafi verið að fá stjórnendur bankanna til þess að minnka umsvif þeirra. ,,Við sögðum þeim að við teldum ekki að fjármögnun með töku innistæðna í Evrópu væri langtímafjármögnun. En þeir töldu okkur of svartsýna," segir Davíð um stjórnendur bankanna. Segir breska blaðið að orð seðlabankastjóra ýti undir þá skoðun að íslensku bankarnir hafi verið svo sterkir bæði efnhagslega og pólitískt að þeir hafi getað hunsað viðvaranir Seðlabankans.

Þá segir Financial Times að meðal helstu skilyrða Alþjóðagjaldeyrissjóðsins fyrir aðstoð við Ísland verði betri yfirsýn og sterkara regluverk í kringum bankakerfið. Hugsanlega sé von á tilkynningu um aðstoð Alþjóðagjaldeyrissjóðsins á morgun sem studd verði af seðlabönkum ýmissa landa.