Keane axlar ábyrgð á slæmu gengi Sunderland

Enska úrvalsdeildarliðið Sunderland hefur nú tapað fjórum leikjum í röð í öllum keppnum frá því það lagði granna sína í Newcastle í lok síðasta mánaðar.

Roy Keane knattspyrnustjóri segist axla ábyrgð á þeim öldudal sem liðið gengur nú í gegn um. "Ég veit að ég ætti að standa mig betur, því það er stjórinn sem ber ábyrgð á þessu. Ég get ekki kennt leikmönnum um þetta. Þeir eru í flestum tilvikum að gera sitt besta. Þetta liggur í smáatriðum sem eru ekki að falla með okkur," sagði Keane.

"Allir elska mann ef maður er að vinna en þegar á móti blæs setja menn spurningamerki við allt sem maður gerir. Við gengum í gegn um tímabil í fyrra þar sem við unnum aðeins einn sigur í þrettán leikjum en maður á það til að gleyma slíkum tímabilum. Margir munu eflaust afskrifa okkur á næstunni og það er góð áskorun," sagði Keane, en Sunderland er komið á fallsvæðið í deildinni með 12 stig úr 12 leikjum.