Rio líklegastur til að fá bandið

Talið er að Rio Ferdinand, varnarmaður Manchester United, sé líklegastur til að verða næsti fyrirliði enska landsliðsins. John Terry hjá Chelsea er einnig talinn koma til greina.

Fabio Capello hefur látið fyrirliðabandið ganga milli manna síðan hann tók við þjálfun enska landsliðsins en ætlar að vera búinn að velja fyrirliða til frambúðar fyrir næsta leik. Valið er talið standa milli þessara tveggja leikmanna.

„Ég yrði mjög sáttur með bæði Rio og John Terry sem fyrirliða," sagði Terry Butcher, fyrrum fyrirliði Englands, í viðtali við BBC. „Ég myndi sjálfur velja Rio vegna þeirra framfara sem hann hefur tekið og hve magnaður leikmaður hann er orðinn."

Steven Gerrard, David Beckham og Gareth Barry hafa einnig fengið að bera bandið síðan Capello tók við. „Mér finnst Rio vera stöðugri en John Terry. Hann missir ekki út eins marga leiki. Þegar hann spilar ekki með Englandi er hans sárt saknað," sagði Butcher.