Beckham segir best fyrir Ronaldo að vera áfram

Stórstjarnan David Beckham hefur gefið Cristiano Ronaldo þau ráð að feta ekki í fótspor sín og yfirgefa Manchester United fyrir Real Madrid. Spænsku risarnir eru með Ronaldo efstan á óskalista sínum.

Beckham gekk til liðs við Real árið 2003. „Ég trúi því að hann sé hjá réttu félagi í dag og ætti ekki að fara. Hann hefur aðeins verið þarna í nokkur ár. Hjá þessu félagi er mikið af fólki sem gefur honum vernd," sagði Beckham.

„Real er frábært félag og eitt það stærsta í heimi en hann er aðeins að byrja hjá United," sagði Beckham. Ronaldo skoraði 42 mörk á nýliðnu tímabili þar sem Manchester United varð bæði Englands- og Evrópumeistari. Hann hefur sagt að framtíð sín skýrist á næstu dögum.