Messi skoraði og verður áfram á Ólympíuleikunum

Lionel Messi er maður dagsins á Ólympíuleikunum. Hann náði samkomulagi við stjórn Barcelona um að fá að taka þátt í leikunum og skoraði í fyrsta leik Argentínu í dag.

Í gær var úrskurðað að Barcelona ætti rétt á því að banna honum að taka þátt í leikunum en eftir að Messi ræddi við stjórnarmenn spænska liðsins fékk hann leyfi til að vera með í Peking.

Argentínumenn eru núverandi Ólympíumeistarar og hófu þeir titilvörnina á 2-1 sigri gegn Fílabeinsströndinni. Messi skoraði fyrsta mark leiksins en Fílabeinsströndin jafnaði. Staðan var jöfn þar til Argentína tryggði sér sigurinn með marki á 86. mínútu leiksins.

Jafntefli varð niðurstaðan í öllum leikjum sem fram fóru á sama tíma. Holland og Nígería gerðu fyrsta markalausa jafnteflið en hinir leikirnir enduðu báðir 1-1. Kína og Nýja-Sjáland áttust við og Suður-Kórea og Kamerún.