Ferli Saha hjá United að ljúka

Louis Saha viðurkennir að ferli hans hjá Manchester United kynni að ljúka eftir að úrslitaleik Meistaradeildar Evrópu lýkur í næstu viku.

Saha hefur átt í þrálátum erfiðleikum með meiðsli og hefur aðeins verið fimm sinnum í byrjunarliði United á leiktíðinni. Hann kom til félagsins í janúar árið 2004 frá Fulham fyrir tólf milljónir punda en hefur aldrei náð sér fyllilega á strik, aðallega vegna meiðsla.

„Ég veit vel að þetta gæti orðið síðasta tækifærið mitt til að spila með United. Ég skil vel ef stjórinn ætlar að velja annan framherja í liðið en mig en það yrði engu að síður sárt fyrir mig því ég ann félaginu svo mikið. Ég get ekki rætt mikið um framtíðina mína eins og er. Aðalmálið er félagið og hver veit hvað gerist ef við vinnum Meistaradeildina."