Löw hugsaði um að hætta

Joachim Löw íhugaði að hætta þjálfun þýska landsliðsins eftir að liðið tapaði fyrir Króatíu í riðlakeppninni.

Síðan þá hefur þýska liðið náð sér vel á strik og er komið í undanúrslit þar sem liðið mætir Tyrkjum.

„Það hvarflaði að mér að hætta," sagði hann í samtali við þýska blaðið Welt am Sonntag. „En ég reynda að hugsa jákvætt og ekki láta þetta draga mig niður. Ég reyni að halda jákvæðni á lofti í liðinu."

Hefði Austurríki unnið Þýskaland í lokaumferð riðlakeppninnar hefðu þeir síðarnefndu fallið úr leik.

„Ef það hefði gerst hefðum við þurft að setjast niður og íhuga hvort það myndi borga sig að halda áfram," sagði Löw.