Hanna Birna: Við áttum ekkert val

Hanna Birna Kristjánsdóttir var rétt í þessu kjörin borgarstjóri Reykjvíkinga á aukafundi borgarstjónar þar sem nýr meirihluti Sjálfstæðisflokks og Framsóknar tók við.

Hanna Birna var ráðin í embættið með átta atkvæðum meirihlutans en minnihlutinn í borgarstjórn sat hjá. Hanna Birna tekur við af Ólafi F. Magnússyni sem borgarstjóri.

Hanna Birna þakkaði traustið og sagðist myndu að verkum eins og hún hefði afl til. Þá sagðist hún ekki ætla að taka þátt í ávirðingum sem gengið hefðu á milli manna. Borgarfulltrúar væru allir að reyna að sinna sínum störfum að bestu getu og þetta hefði verið erfitt.

Þá sagði hún að taka ætti stóra hagsmuni borgarbúa fram yfir smærri hagsmuni augnabliksins. Það hefðu verið framtíðarhagsmunir heillar borgar að slíta samstarfi við Ólaf F. Magnússonar og taka upp samstarf við Óskar.

Hanna sagði að allt frá því að fyrsti meirihlutinn hefði fallið hefði ríkt ókyrrð í borgarstjórn en ábyrgðin hefði verið framsóknarmanna og sjálfstæðismanna að taka fast á málum.

Þakkaði hún Ólafi F. Magnússyni fyrir samstarfið en sagði það hafa verið of erfitt. Of mikið hefði borið á milli flokkanna og nauðsynlegar málamiðlanir hefðu ekki verið til staðar í of mörgum tilvikum. Traustið hefði brostið og um leið sá kraftur sem þyrfti að vera við stjórn borgarinnar. „Við sjálfstæðismenn áttum ekkert val," sagði Hanna Birna. Breyttar efnahagsforsendur hefðu kallað á nýjan meirihluta.

Hanna Birna sagði að hinn nýi meirihluti ætti eftir að sanna sig og borgarstjórn þyrfti að endurvinna traust borgarbúa. Sagði hún að í borgarstjórn réði viljinn til þess að láta gott af sér leiða og því hefðu margir góðir hlutir orðið að veruleika á síðustu misserum. Í staðinn yrði stofnaður opinn fjárfestingarsjóður.

Hanna Birna bað um tíma til að láta verkin tala og halda áfram á réttri leið. Sagði hún málefnasamning Sjálfstæðisflokksins og Framsóknarflokksins að byggjast á miklu leyti á fyrri málefnasamningi flokkanna.

Þá sagði hún að nýr meirihluti myndi vinna aðgerðaáætlun vegna breytinga í efnahags- og atvinnuumvherfi en borgarstarfsmönnum yrði ekki sagt upp eða þjónusta skert við fjölskyldur. Meirihlutinn myndi leggja áherslur á gróskumikið atvinnulíf og því yrði aftur haldið í rannsóknir vegna Bitruvirkjunar. Þá hefði náðst sátt um mál Orkuveitunnar og REI sem fælist meðal annars í sér að ekki yrði frekara fjármagn lagt inn í REI til útrásarverkefna.