Ballack verður áfram fyrirliði

Michael Ballack verður áfram fyrirliði þýska landsliðsins í knattspyrnu eftir að hafa beðist afsökunar á opinberri gagnrýni sinni á landsliðsþjálfarann á dögunum.

Í tilkynningu frá þýska knattspyrnusambandinu kemur fram að þeir Ballack og Joachim Löw hafi átt fund í Frankfurt í gær þar sem þeir hafi gert upp sín mál.

Skilyrði fundarins hafi verið það að Ballack hafi verið búinn að biðjast afsökunar á ummælum sínum um daginn, þegar hann gagnrýndi Löw fyrir virðingarleysi í garð eldri leikmanna landsliðsins.