Ummæli í ævisögu Drogba til rannsóknar

Enska knattspyrnusambandið hefur staðfest að það muni taka til rannsóknar kafla í óútkominni ævisögu framherjans Didier Drogba hjá Chelsea.

Kaflar úr bókinni hafa þegar verið birtir og þar kemur fram á einum stað að Drogba hafi átt það til að ná sér vísvitandi í gul spjöld í ákveðnum leikjum til að geta tekið út leikbann í "þægilegri" leikjum í töflunni.

Þetta segist Drogba hafa gert af fyrirmælum Jose Mourinho, sem framherjinn segir hafa verið mjög klókan í þessum efnum. Drogba hafi fyrir vikið orðið sér út um "frí" þegar álagið var mikið.

"Mourinho reiknaði allt út. Hann skoðaði dagskrána og reiknaði út spjöldin sem leikmenn höfðu fengið. Hann hvíslaði stundum að mér að það gæti verið hentugt að fá spjald í leiknum í dag, því þá gætir þú misst af þeik gegn þessu eða hinu liði - þá fengi ég frí. Ég mótmælti þessu ekki, enda gat ég fyrir vikið skotist til Dubai í smá frí," sagði Drogba í ævisögu sinni.