Avram Grant, stjóri Chelsea, viðurkennir að óvíst sé hvort hann verði stjóri liðsins á næstu leiktíð. Hann vill þó ekki ræða framtíð sína í smáatriðum fyrr en eftir úrslitaleik Meistaradeildarinnar á miðvikudag.
Menn eins og Frank Rijkaard, Sven-Göran Eriksson, Guus Hiddink og Roberto Mancini hafa allir verið orðaðir við knattspyrnustjórastöðuna hjá Chelsea.
"Ef félagið verður ósátt við mig í lok leiktíðar, þá verður bara að hafa það. Sömuleiðis ef ég verð ósáttur við félagið - ef ég vil fara, þá á ég ekki von á að það verði vandamál. En í augnablikinu gerist ekki neitt, við vitum meira eftir úrslitaleikinn í vikunni," sagði Grant.
"Maður veit að maður er hjá toppliði þegar maður setur félagsmet með níu sigrum í röð og gerir svo jafntefli - og menn líta á það sem stórslys. Við skulum ræða næsta ár eftir úrslitaleikinn," sagði Grant.
