Skorar á Barry að fara til Liverpool

Les Rogers, þjálfarinn sem uppgötvaði hæfileika miðjumannsins Gareth Barry hjá Aston Villa fyrir 17 árum síðan, hefur skorað á hann að ganga í raðir Liverpool.

Barry hefur verið í röðum Villa í 10 ár og spilaði mjög vel með liði sínu í vetur. Þá fékk hann tækifæri með enska landsliðinu og þótti standa sig prýðilega. Gamli þjálfari Barry segir tækifærið til að ganga í raðir Liverpool einfaldlega of gott til að sleppa því.

"Já, ég held að hann ætti að stökkva á þetta tækifæri, því þau koma ekki á hverjum degi. Hann hefur sýnt Villa traust með því að fara ekki þegar hann hefur fengið tækfæri til þess fyrr á ferlinum, en hann gæti átt eftir að sjá eftir því ef hann grípur ekki tækifærið núna," sagði Rogers.

"Ég held að hann muni fara til Liverpool - og ég held að hann ætti að gera það."