Garðar skoraði tvö í stórsigri Fredrikstad

Garðar Jóhannsson var heldur betur í stuði í kvöld þegar lið hans Fredrikstad vann 5-0 stórsigur á Aalesund 5-0 í norsku úrvalsdeildinni í knattspyrnu. Garðar skoraði tvö mörk í fyrri hálfleik og lagði upp fimmta og síðasta markið.

Garðari var svo skipt af velli á 82. mínútu en Haraldur Freyr Guðmundsson var í byrjunarliði Álasunds í leiknum og spilaði allar 90 mínúturnar. Fredrikstad er í öðru sæti deildarinnar.

Stabæk er í toppsætinu eftir 2-0 útisigur á Lyn í kvöld. Veigar Páll Gunnarsson var í byrjunarliði Stabæk í kvöld.

Bodo/Glimt lagði Tromsö 2-0 á heimavelli þar sem Birkir Bjarnason kom inn sem varamaður í liði heimamanna í hálfleik.

Rosenborg vann öruggan 4-0 sigur á Lilleström og þá vann Brann 1-0 sigur á Valeringa í grannaslag liðanna.

Kristján Örn Sigurðsson og Gylfi Einarsson voru í byrjunarliði Brann í kvöld en Ólafur Örn Bjarnason sat á bekknum. Gunnar Heiðar Þorvaldsson sat allan tímann á varamannabekk Valerenga, sem lék með 10 menn frá 65. mínútu og fékk á sig markið sem réði úrslitum 12 mínútum síðar.