Það þýðir ekkert að berja Gomes

Harry Redknapp ætlar að standa með markverði sínum Heurelho Gomes þrátt fyrir glórulaus mistök hans leik eftir leik með liði Tottenham.

Stuðningsmenn Tottenham hafa fengið í magann í hvert einasta sinn sem andstæðingar liðsins taka horn- og aukaspyrnur gegn liðinu undanfarið, því úthlaup Brasilíumannsins hafa verið ansi skrautleg.

Skelfileg mistök markvarðarins reyndust Tottenham afar dýrkeypt í gær þegar liðið tapaði fyrir Fulham.

"Maður sá það glöggt að Fulham var að stíla inn á það að gera honum erfitt fyrir í öllum hornspyrnum. Ég gæti trúað að lið gætu farið að einbeita sér mikið að því að gera honum lífið leitt," sagði Harry Redknapp.

Hann segir tilgangslaust að skamma markvörðinn og ætlar að standa með honum.

"Gomes gerði slæm mistök þegar hann fékk á sig þetta mark, en hann varði líka vel nokkrum sinnum og ég verð að hafa hann í markinu. Hann er markvörður okkar og það þýðir ekkert að berja hann - ég hef engan annan. Það er ekki auðvelt en ég hef sagt honum að missa ekki móðinn," sagði Redknapp.