Ashton búinn að semja við West Ham

Sóknarmaðurinn Dean Ashton hefur skrifað undir nýjan samning við Íslendingaliðið West Ham sem gildir til loka leiktíðarinnar 2013.

Ashton hefur átt í viðræðum við West Ham um nýjan samning í dágóðan tíma og er sagður allt að þrefaldast í launum. Samkvæmt fréttum í Englandi verður hann meðal launahæstu leikmanna liðsins með 70 þúsund pund í vikulaun.

Hann var meðal annars orðaður við Manchester United og Newcastle í vetur en Ashton, sem er 24 ára gamall, ákvað að halda kyrru fyrir í Lundúnum.

„Ég er mjög ánægður. Ég hef alltaf sagt að ég vilji framlengja samning minn," sagði Ashton á heimasíðu West Ham. „Ég hlakka mikið til næsta tímabils."

Ashton gekk til liðs við West Ham frá Norwich í janúar 2006 en ökklameiðsli urðu til þess að hann missti af tímabilinu 2006-7.

West Ham er í eigu Björgólfs Guðmundssonar.