Barton saklaus í leigubílamáli

Joey Barton, leikmaður Newcastle, var úrskurðaður saklaus af ákærum að hafa valdið skemmdum í leigubíl í mars síðastliðnum.

Barton hóf nýverið afplánun á sex mánaða fangelsisdómi vegna líkamsárásar í desember síðastliðnum sem átti sér stað fyrir utan McDonald's veitingastað í Liverpool.

Ótrúlega nokk tengdist leigubílaatvikið einnig McDonald's veitingastað í Liverpool. Barton var ásamt öðrum í leigubíl og bað bílstjórann um að aka á veitingastaðinn.

Barton var sakaður um að hafa verið óánægður með að leigubílstjórinn vildi ekki keyra að bílalúgunni og að hafa valdið skemmdum í bílnum, til að mynda á útvarpinu.

Fingraför á útvarpinu sýndu hins vegar annað og játaði annar maður, frændi Barton, á sig skemmdirnar.

Bæði leigubílstjórinn og Barton sjálfur sökuðu hvorn annan um að hafa hagað sér illa og sögðu þeir báðir fyrir rétti að þeir hefðu orðið hræddir við hinn aðilann.