Segir lítið kjöt á beinum aðgerða ríkisstjórnarinnar

Aðgerðir ríkisstjórninnar sem kynntar voru fyrr í dag eru skref í rétta átt, að mati Steingríms J. Sigfússonar formanns Vinstri grænna. ,,Aftur á móti sló mig hversu tillögurnar eru veiklulegar og hversu lítið kjöt er á beinum."

Ríkisstjórnin mun leggja fram sérstakt frumvarp til þess að létta greiðslubyrði einstaklinga með verðtryggð lán ásamt því að endurskoða lög um dráttarvexti. Þetta kom fram á blaðamannafundi sem Geir H. Haarde, forsætisráðherra, og Ingibjörg Sólrún Gísladóttir, utanríkisráðherra, efndu til í dag. Þar var farið yfir margháttaðar aðgerðir sem snúa að heimilunum í landinu í núverandi þrengingum.

,,Vandinn er núna. Þannig að ég get ekki gefið þessa mjög háa einkunn. Í besta falli get ég sagt að þetta sé viðleitni en hún er veikluleg," segir Steingrímur.

Steingrímur segist ekki geta lesið annað út úr svörum forystumanna ríkisstjórnarinnar á blaðamannafundinum að stjórnin sé að undirbúa uppgjöf í Icesave-deilunni þvert á fyrri heitstrengingar sínar.

,,Ég hef rosalega áhyggjur og ég er hræddur um að við töpum allri samningsstöðu með því að skrifa upp á þetta núna því Icesave-reikningapakkinn er pólitískt og siðferðilega eitraður."

Aðspurður hvort að ríkisstjórnin eigi annarra kosta völ viðurkennir Steingrímur að staðan sé vissulega þröng. ,,Aftur á móti höfum við gagnrýnt ríkisstjórnina fyrir að hafa ekki fleiri spil á hendi og fleiri úrræði. Þegar við lögðumst gegn umsókninni til IMF sögðum við meðal annars að það væri hættulegt að setja allt okkar traust á þá einu leið vitandi ekki einu sinni hverjir skilmálarnir yrðu og eiga þá enga aðra möguleika sem reyndist síðan raunin."