Wenger vongóður um að landa Nasri

Arsene Wenger, knattspyrnustjóri Arsenal, segir líklegt að félagið nái að landa kaupunum á franska landsliðsmanninum Samir Nasri áður en EM í knattspyrnu hefst í næsta mánuði.

Arsenal hefur lengi verið orðað við þennan efnilega leikstjórnanda en hann var valinn í fyrsta landsliðshóp Frakka fyrir EM í sumar. Nasri þessum hefur verið líkt við landa sinn Zinedine Zidane fyrir lipra takta á miðjunni með liði Marseille.

Fari svo að Arsenal landi leikmanninum, fengi hann eflaust það hlutverk að fylla skarð Alexander Hleb sem líklega er á förum frá Arsenal í sumar. Nasri er aðeins tvítugur en er reyndar nýbúinn að framlengja samning sinn við Marseille.