LÍÚ telur brýnt að efla starfsemi Landhelgisgæslunnar

Friðrik J. Arngrímsson, framkvæmdastjóri LÍÚ segir að fréttir af ítrekuðum meintum ólöglegum veiðum færeyskra skipa í íslenskri lögsögu sýna betur en nokkuð annað hve brýnt er að efla starfsemi Landhelgisgæslunnar.

„ Hún hefur um árabil verið í fjársvelti. Gæslan sinnir ekki aðeins eftirliti heldur er öryggishlutverk hennar afar mikilvægt fyrir íslenska sjómenn," segir Friðrik í frétt á vefsíðu LÍÚ um málið.

Greint var frá því fyrir helgina að rannsókn stæði nú yfir í Færeyjum á meintum ólöglegum veiðum tveggja færeyskra skipa. Fjölmiðlar í Færeyjum og hér heima hafa greint frá því að ákæruvaldið í Færeyjum hafi rökstuddan grun um að skipin hafi veitt í íslenskri lögsögu með slökkt á fjareftirlitsbúnaði sem sýnir hvar skipin eru stödd.

Samkvæmt fjölmiðlum hefur annar skipstjórinn viðurkennt að hafa kastað siglingatölvu skips síns í sjóinn á leið til hafnar þann 16. nóvember sl.