Ég verð ekki rekinn - hætti sjálfur fyrir sjötugt

Sir Alex Ferguson hefur gefið það upp að hann muni hætta sem knattspyrnustjóri Manchester United á næstu þremur árum, eða fyrir sjötugt.

Ferguson gerði United að enskum meistara og Evrópumeistara í vor og hefur verið að íhuga að hætta allar götur síðan árið 2002. Hann ætlaði að hætta fyrir sex árum, en hætti skyndilega við það.

Ferguson er nú orðinn 66 ára gamall og segist ekki ætla að halda áfram þangað til hann verður sjötugur.

"Ég verð ekki hérna þegar ég verð sjötugur, ég get lofað því. Ég verð ekki lengur hérna en þrjú ár í viðbót í allra, allra mesta lagi," sagði Ferguson.

"Ég verð líka að hugsa um konu mína, hún er að eldast líka og ég verð að hugsa um það. Hún á skilið að fá aðeins meira af tíma mínum og því eldri sem maður verður, því meira samviskubit fær maður þegar maður hugsar um það. Ég væri til í að ferðast til staða sem ég hef ekki komið á áður," sagði Skotinn - sem útilokar að honum verði sagt upp störfum hjá United.

"Það er ekki möguleiki að ég verði rekinn. Ég held að ég muni sjálfur ákveða hvenær ég hætti og David Gill (framkvæmdastjóri) er sáttur við það," sagði Ferguson.