Valgerður minnist Rúna Júl

Rúnar Júlíusson hefur verið hluti af lífi Valgerðar Sverrisdóttur, formanns Framsóknarflokksins, frá Kvennaskólaárum hennar.

,,Hann hefur verið hluti af lífi mínu frá unglingsárunum þegar við vinkonurnar í Kvennó áttum hann sem átrúnaðargoð og dýrkuðum Hljóma," segir Valgerður í pistli á heimasíðu sinni.

Rúnar lést í nótt af völdum hjartaáfalls. Fjölmargir hafa minnst hans í dag með hlýum orðum. Bæði fólk sem þekkti Rúnar persónulega og aðrir sem hrifust af tónlist hans. Valgerður er ein af mörgum sem hrifust af tónlistinni og tengir góðar minningar við hana.

Valgerður segir að það sé margt að minnast frá sjöunda áratugnum. Bítlarnir komu fram á sjónarsviðið og ollu byltingu. ,,Og við eignuðumst okkar eigin Bítla, nefnilega Hljóma frá Keflavík."

Ráðherran fyrrverandi rifjar upp á að sunnudögum hafi verið haldinn böll fyrir unglinga í Skátaheimilinu við Snorrabraut og þar hafi Hljómar spilað.

,,Þar mættum við vinkonurnar og tókum fullan þátt í gleðinni. Og við gerðum meira. Við biðum fyrir utan Glaumbæ þar sem Hljómar æfðu til að geta horft á þá ganga frá húsinu og út í Bensinn sem var hinn eini sanni Hljómabíll og bar einkennisstafina Ö-982."

Valgerður segist hafa átt sérstaka Hljómabók þar sem hún safnaði myndum af Hljómum og öllu sem hægt var að tengja við hljómsveitina. ,,Þessi bók er nú í vörslu tónlistarsafnsins í Reykjanesbæ. Það var Rúnar sem veitti bókinni viðtöku fyrir hönd safnsins.

Lífið skiptist í tímabil, að mati Valgerðar. ,,Eitt af tímabilunum í mínu lífi er tímabilið með Hljómum frá Keflavík. Blessuð sé minningin um Rúnar Júlíusson."

Pistil Valgerðar er hægt að lesa hér.