Berger genginn til liðs við Spörtu Prag

Tékkinn Patrik Berger hefur yfirgefið herbúðir Aston Villa og gengið til liðs við Sparta Prag í heimalandi sínu án greiðslu.

Berger er 34 ára gamall og lék áður með Liverpool í Englandi. Hann þótti tala af sér er hann viðurkenndi að hafa ráðlagt Gareth Barry, liðsfélaga sínum, að ganga til liðs við Liverpool.

Þá var sagt að hann hefði leikið sinn síðasta leik með Aston Villa og nú hefur það komið á daginn.

Berger skrifaði undir tveggja ára samning við Spörtu Prag en hann lék með liðinu sem unglingur áður en hann gerði sinn fyrsta atvinnumannasamning við erkifjendur liðsins, Slavia Prag, árið 1991.