Kjartan og Stefán klárir í slaginn

Bjarni Sigurðsson, markmannsþjálfari íslenska landsliðsins, gerði garðinn frægann með norska félaginu Brann á árum áður og þekkir nokkuð vel til norska landsliðsins og norska boltans. Leikur Íslands gegn Noregi leggst vel í hann.

„Þeir koma til með að pressa á okkur í byrjun og reyna að koma marki á okkur snemma og við verðum að vera tilbúnir í baráttuna. Ef við náum að halda markinu hreinu þá fáum við alltaf einhverja sóknarmöguleika og þá getur allt gerst," segir Bjarni.

Það verður seint sagt að íslensku landsliðsmarkverðirnir, Kjartan Sturluson og Stefán Logi Magnússon, séu hoknir af reynslu en þeir hafa samtals leikið sjö landsleiki. Kjartan á fimm landsleiki að baki og Stefán tvo. Bjarni engu að síður trú á því að þeir séu tilbúnir í komandi verkefni.

„Þeir eru klárir í slaginn. Það er engin spurning. Þeir hafa vitanlega ekki mikla leikreynslu með landsliðinu en þeir eru báðir sterkir og stórir og hafa fína reynslu með félagsliðum sínum og ég treysti þeim fullkomlega til þess að standa sig," segir Bjarni.