Davids á leið frá Ajax

Samningur Edgar Davids við Ajax rennur út í sumar og verður ekki endurnýjaður. Þetta kemur fram á heimasíðu félagsins.

„Þetta er svekkjandi aðskilnaður þar sem ég er að skilja við lið sem ég hef sérstakar tilfinningar til. Ég er uppalinn í Amsterdam," sagði Davids en hann veit ekki hver næsti viðkomustaður sinn verður.

Þessi 35 ára miðjumaður á 74 landsleiki og sex mörk að baki fyrir Holland. Hann hefur þó ekki verið valinn í landsliðið síðan Marco van Basten var ráðinn þjálfari eftir Evrópumótið 2004. Van Basten tekur við Ajax eftir Evrópumótið í sumar.

Atvinnumannaferill Davids hjá Ajax hófst þegar hann var 18 ára. Með félaginu vann hann Evrópukeppni meistaraliða. 1996 fór hann til AC Milan en átján mánuðum síðar gekk hann til liðs við Juventus þar sem hann lék í sex ár.

Eftir viðkomur hjá Barcelona, Inter og Tottenham þá kom Davids aftur til Ajax í janúar 2007.