Sjálfboðaliða leitað fyrir EM 2009

Knattspyrnusamband Evrópu hefur auglýst eftir sjálfboðaliðum fyrir EM í fótbolta sem fer fram í Finnlandi á næsta ári.

Alls þarf átta hundruð sjálfboðaliða til starfa í Finnlandi en keppnin hefst þann 23. ágúst á næsta ári og stendur yfir til 10. september. Ísland er meðal þátttökuþjóða í fyrsta sinn.

Umsækjendur þurfa að vera átján ára eða eldri og með góð tök á ensku. Ekki er nauðsynlegt að tala finnsku eða búa yfir reynslu á þessu sviði. Það hjálpar þó til að tala tungumál einhverra þátttökuþjóðanna.

Hægt er að sækja um með því að senda tölvupóst á netfangið juha.tuominen@weuro2009.palloliitto.fi. Umsóknarfrestur er til 15. júní 2009.