Alonso ekki á förum frá Liverpool

Spánverjinn Xabi Alonso segir að það sé kolrangt að hann sé á leiðinni frá Liverpool nú í sumar.

Sögusagnir þess efnis hafa verið lengi við lýði en fjölmiðlar bæði á Ítalíu og Spáni hafa verið duglegir að flytja fréttir af því. Bæði Real Madrid og Juventus hafa verið sögð hafa áhuga á Alonso.

Alonso skrifaði í júní síðastliðnum undir samning við Liverpool sem gildir til ársins 2012 og segir Alonso að áðurnefndur fréttaflutningur komi sér á óvart.

„Þetta kemur mér á óvart því ég veit hver sannleikurinn er," sagði Alonso. „Ég hef ekkert heyrt frá Real Madrid né öðru félagi. Sem stendur er ég hjá Liverpool. Ég er með samning við félagið og vil vera hér áfram."