Sienna málar sig út í horn

Breska dagblaðið Daily Mirror greinir frá því að Sienna Miller og gifti kærasti hennar ætli að hefja búskap bráðlega. Samband þeirra hefur bakað Siennu miklar óvinsældir.

„Áður en þau fóru í frí til Ítalíu var Sienna svo gott sem flutt inn til Balthazars. Eiginkona hans og börnin þeirra fjögur höfðu flutt út og Sienna og Balthazar nutu þess til hins ýtrasta að vera ein í húsinu. Hana langar þó ekki að flytja inn í húsið sem Balthazar deildi með konu sinni heldur vill hún finna nýtt heimili fyrir sig og Balthazar. Vinum hennar finnst hún þó vera að fara einum of geyst í sakirnar,“ sagði heimildarmaður við Mirror. Sienna og Balthazar eyddu saman tíma á Ítalíu fyrir stuttu og náðust þar myndir af parinu þar sem þau föðmuðust og kysstust í sólinni. Eiginkona Balthazars hefur hingað til ekki tjáð sig um málið en í kjölfar birtingar myndanna lét hún hafa eftir sér að henni finnist hún niðurlægð vegna framkomu parsins.

„Sienna naut athyglinnar sem hún fékk frá Balthazar á Ítalíu og virtist vera algjörlega grunlaus um það sem hún er að gera konu hans og börnum,“ var haft eftir einum sjónarvotti. Það eru þó ekki nema tveir mánuðir síðan leikkonan ræddi um samband sitt við leikarann Rhys Ifans og sagði við það tækifæri að hún hefði með honum fundið sanna ást. „Þegar einhver segir nafnið hans þá brosi ég eins og kjáni því það fær mig til að hugsa um hann og það gerir mig hamingjusama. Ég elska Rhys, en hann er jafnframt minn besti vinur,“ sagði leikkonan um Rhys. Stuttu seinna sleit hún sambandinu við leikarann símleiðis. Rhys Ifans tilheyrir vinahóp sem hefur mikil völd innan tísku- og kvikmyndaheimsins og er hann meðal annars góður vinur fyrirsætunnar Kate Moss.

„Framkoma Siennu gerði marga vini Rhys mjög reiða og með því málaði hún sig algjörlega út í horn,“ var haft eftir heimildarmanni. Með sambandi sínu við Balthazar virðist Sienna vera að skaða nafn sitt enn frekar því Rosetta Getty, eiginkona Balthazars, er vel liðin meðal fólks í Hollywood. „Sienna á eftir að eiga erfiða tíma fram undan og henni verður ekki tekið opnum örmum í Hollywood.“ Vinir Siennu segja að þótt hún virðist oft vera hæversk sé hún mjög sjálfsörugg og meðvituð um eigin fegurð.