Redknapp vill fá Eið til Portsmouth

Harry Redknapp segir að hann hafi mikinn áhuga á að fá Eið Smára Guðjohnsen til liðs við enska úrvalsdeildarfélagsins Portsmouth.

„Eiður er góður leikmaður og er útlit fyrir að hann sé á förum frá Barcelona," sagði Redknapp, stjóri Portsmouth, í samtali við staðarblað í bænum. „Ef það er tilfellið hefði ég vissulega áhuga á að fá hann til okkar."

„Ég þekki Eið og hann er góður vinur Jamie (Redknapp, sonar Harry). Þetta er góður strákur og frábær knattspyrnumaður."

Þó er talið að Peter Crouch sé efstur á óskalista Redknapp en Liverpool vill fá tíu milljónir punda fyrir hann. Það þykir forráðamönnum Portsmouth aðeins of mikið og gæti því Eiður verið góður kostur í staðinn fyrir Crouch.

Með Portsmouth leikur Hermann Hreiðarsson.